Կոմիտասի Թանգարան-ինստիտուտ
Կոմիտասի թանգարան ինստիտուտի գործունեությունն ուղղված է հայ ազգային կոմպոզիտորական դպրոցի հիմնադիր Կոմիտաս Վարդապետի ստեղծագործական ժառանգության հանրահռչակմանը։
Թանգարան-ինստիտուտն ունի մշտական ցուցադրության ութ սրահ։ Ժամանակավոր ցուցադրությունների համար նախատեսված սրահում պարբերաբար կազմակերպվում են Կոմիտասին, նրա ժամանակակիցներին, ինչպես նաև արվեստի տարբեր ճյուղերին առնչվող ցուցադրություններ (երաժշտություն, գեղանկարչություն, գրաֆիկա, լուսանկարչություն, դեկորատիվ-կիրառական արվեստ և այլն)։
Կոմիտասի թանգարան-ինստիտուտում գործող գիտահետազոտական կենտրոնը նպատակ ունի հանգամանորեն և համակարգված կերպով հետազոտել Կոմիտասի գործունեությունը, Կոմիտասին վերաբերող արխիվային նյութերը, ինչպես նաև ուսումնասիրել հայ ավանդական՝ ժողովրդական և հոգևոր երաժշտության պատմական ու տեսական խնդիրները՝ ըստ Կոմիտասի գիտական սկզբունքների։
Կոմիտասի թանգարան-ինստիտուտի հրատարակչությունը լույս է ընծայում գիտական աշխատություններ՝ մենագրություններ, գիտական հոդվածների ժողովածուներ, մատենաշարեր, ժամանակավոր ցուցադրությունների սրահում կազմակերպված ցուցադրությունների պատկերագրքեր, որոնց թեման առնչվում է Կոմիտասին, նրա ժամանակակիցներին, հայ ժողովրդական և հոգևոր երգարվեստին, և լայն առումով՝ հայ մշակույթին։
Կոմիտասի թանգարան-ինստիտուտի համերգասրահում կազմակերպվում են ավանդական և դասական երաժշտության համերգներ։
Կոմիտասի թանգարան–ինստիտուտի գործունեության կարևոր ճյուղերից մեկն է կրթական ծրագրերի իրականացումը: Դպրոցականների և այլ տարիքայինու սոցիալական խմբերի համար թանգարան-ինստիտուտն առաջարկում է ուսուցողական բազմաժանր ծրագրեր, որոնք ստեղծում են յուրօրինակ հանդիպում Կոմիտասի ժառանգության տարբեր շերտերի, նրա ժամանակի, միջավայրի և գործունեությանն առնչվող այլ ոլորտների հետ:
Կոմիտասի թանգարան–ինստիտուտի կրթական ծրագրերի մեջ կայուն տեղ է զբաղեցնում ամառային դպրոցը։ Այն անցկացվում է երկու փուլով՝ ըստ տարիքային երկու խմբի՝ հնարավորություն տալով ուսումնասիրելու երաժշտությանն ու արվեստին վերաբերող բազմազան թեմաներ։
Սեպտեմբերի 26-ից հոկտեմբերի 8–ը իրականացվում է «Կոմիտաս» ամենամյա միջազգային գիտաժողով-փառատոնը, որը Կոմիտասի թանգարան-ինստիտուտի գործունեության կարևոր ուղղություններից է։ Այն ներառում է գիտական նստաշրջան և համերգաշար: Գիտաժողով-փառատոնի միջազգային ձևաչափն ապահովվում է արտասահմանի տարբեր երկրներից երաժիշտ-կատարողների և գիտնականների մասնակցությամբ։ Փառատոնի հայեցակարգի հիմքում Կոմիտասի բազմաճյուղ՝ բանահավաքչական, երաժշտագիտական և ստեղծագործական գործունեության և հայ ազգային երաժշտական մշակույթի հանրահռչակումն է, ինչպես նաև հայ արդի երաժշտագիտության տարբեր հիմնախնդիրների քննարկումը:
Կոմիտասի թանգարան–ինստիտուտում գործում է երաժշտական գրադարան, որը երաժշտագիտական գրքերի և ձայնապնակների ամենահարուստ հավաքածուն ներառող կառույցն է Հայաստանում։
Աշխատանքային օրեր՝ ամեն օր, բացի չորեքշաբթի
Աշխատանքային ժամերը՝ 10:00-16:30
Էքսկուրսիաների համար գրանցվել նախապես։
Էքսկուրսիայի արժեքը հայերեն 2000 դրամ է։
Էքսկուրսիայի արժեքը ռուսերեն/անգլերեն 4000 դրամ է:
Թանգարանում առկա է թեքահարթակ։
Մուտքի տոմս - 1500 դրամ։
Աշակերտական, ուսանողական, թոշակառու տոմս -750 դրամ:
Մինչև 12 տարեկան երեխաների մուտքը անվճար է։